కూతురు వయసున్న యువతిని లోబరుచుకుని పెళ్లి చేసుకున్న వ్యక్తి.. చివరకు ఇద్దరూ పురుగుల మందు తాగి ఆత్మహత్య
కొన ఊపిరితో ఆసుపత్రిలో చికిత్స పొందుతూ.. నాన్న నన్ను బ్రతికించు, నాకు చచ్చిపోవాలని లేదంటూ ప్రాణాలు విడిచిన యువతి
వరంగల్: ఎనుమాముల ఇందిరమ్మ కాలనీలో విషాదకర ఘటన వెలుగులోకి వచ్చింది. తనకంటే దాదాపు 20 ఏళ్లు పెద్దవాడైన, పెళ్లై పిల్లలున్న వ్యక్తితో ప్రేమలో పడి, పెళ్లి చేసుకున్న ఓ యువతి.. చివరకు అతనితోపాటే ఆత్మహత్యకు పాల్పడింది. ఆసుపత్రిలో కొన ఊపిరితో ప్రాణాలతో పోరాడుతూ, తన తండ్రితో “నాన్న నన్ను బ్రతికించు, నాకు చచ్చిపోవాలని లేదు” అంటూ వేడుకుంటూనే ప్రాణాలు విడిచిన ఆ యువతి కథ అందరినీ కలచివేసింది.
అసలేం జరిగింది?
వరంగల్ ఎనుమాముల ఇందిరమ్మ కాలనీకి చెందిన 22 ఏళ్ల గాయత్రి ఇంటర్ మధ్యలోనే ఆపేసి ఇంట్లో ఉన్న ఆమెకు, వారి ఇంటి ఎదురుగా ఉండే 42 ఏళ్ల వేల్పుగొండ స్వామి అనే డీసీఎం డ్రైవర్‌తో పరిచయం ఏర్పడింది. స్వామికి అప్పటికే పెళ్లై, ఇద్దరు కొడుకులున్నారు. అయినా గాయత్రిని మాయమాటలతో లోబరుచుకుని ప్రేమాయణం సాగించాడు.
ఈ విషయం గాయత్రి తల్లిదండ్రులకు తెలియడంతో ఆరు నెలల కింద పెద్దల సమక్షంలో పంచాయతీ పెట్టారు. పెద్దలు మందలించడంతో స్వామి హన్మకొండకు మకాం మార్చాడు. అయితే, గాయత్రితో తన సంబంధాన్ని మాత్రం రహస్యంగా కొనసాగించాడు.
గాయత్రికి పెళ్లి చేయడానికి ఆమె తల్లిదండ్రులు ప్రయత్నిస్తున్న సమయంలోనే, ఈ నెల 2న గాయత్రి ఇంట్లోంచి 10 తులాల బంగారం, నగదు తీసుకుని వెళ్లిపోయింది. స్వామితో కలిసి విజయవాడ, గుంటూరులో గడిపిన ఆమె, ఆ తర్వాత వేములవాడలో అతన్ని పెళ్లి చేసుకుంది.
విషాద ముగింపు
పెళ్లి చేసుకున్న తర్వాత, ఇద్దరూ అన్నారం షరీఫ్‌కు వచ్చి ఒక అద్దె గది తీసుకున్నారు. ఈ బంధం ఎక్కువ కాలం నిలబడదని భావించిన స్వామి, గాయత్రిని ఆత్మహత్యకు ప్రేరేపించాడు. ఫలితంగా, ఇద్దరూ కలిసి గడ్డి మందు (పురుగుల మందు) తాగారు.
స్వామి అక్కడికక్కడే మృతి చెందాడు. కొన ఊపిరితో ఉన్న గాయత్రిని రూమ్ ఓనర్ గమనించి, వెంటనే వరంగల్ ఎంజీఎం ఆసుపత్రికి తరలించాడు. రూమ్ ఓనర్ ఇచ్చిన సమాచారంతో గాయత్రి తల్లిదండ్రులు ఆసుపత్రికి చేరుకున్నారు. తన తండ్రిని చూసిన గాయత్రి, “నాన్న నన్ను బ్రతికించు, నాకు చచ్చిపోవాలని లేదు” అంటూ ప్రాధేయపడింది. కానీ, విధి ఆడిన వింత నాటకంలో, ఆ కొన్ని క్షణాల తర్వాతే గాయత్రి తుది శ్వాస విడిచింది. ఈ ఘటన స్థానికంగా తీవ్ర చర్చనీయాంశంగా మారింది.
